ظرف (3)
1- یئر ظرفلرى
ایش و حرکتین باش وئردیگى یئرى بیلدیرن ظرفلره یئر ظرفلرى دئییلیر. بو ظرفلر هارا؟ هارایا؟ هاردا؟ هارادان؟ ... سواللاریندان بیرینه جاواب وئریر. یئر ظرفلرى ده قورولوشلارینا گؤره اۆچ جۆر اولور:
الف. ساده یئر ظرفلرى:
بیر سؤزدن عیبارت اولان و یئر مفهومو داشییان ظرفلره ساده یئر ظرفلرى دئییلیر. بونلارین بعضیسینده حال شکیلچیلرى ده اولور، آنجاق مضمونجا ساده دیر. میثاللار: آرخا، یان، کنار، قیراق، ائشیک، ایچهرى، بورا، اورا، یاخین، آشاغى، آشاغیدا...
ب. دۆزهلتمه یئر ظرفلرى:
ساده یئر ظرفلرینه شکیلچى قوشماقلا دۆزهلن ظرفلره دۆزهلتمه یئر ظرفلرى دئییلیر. بو ظرفلر دیلیمیزده چوخ آزدیر. میثاللار: آرالیق، آرالیقدان، یاخینلیقدا، اورتالیغا، آرالیغا، گئندن، اوزاقلیغا، اوزاقدان، یاخینلیقدان، ...
ج. مۆرکب یئر ظرفلرى:
یئر مفهومو اولان ایکى سؤزدن دۆزهلمیش ظرفلره مۆرکب یئر ظرفلرى دئییلیر. بونلارین اؤنملیلرى آشاغیداکیلاردیر:
1. ایکى ضید سؤزدن دۆزهلن مۆرکب یئر ظرفلرى. میثاللار: اورا-بورا، اوردا-بوردا، ساغا-سولا، دال-قاباق، ساغدان-سولدان، اوردان-بوردان، ...
2. یئر معناسى اولان کلمهلرین اولینه "او-بو" عوضلیکلریندن بیرینى آرتیرماقلا دۆزهلنلر. میثاللار: او طرفده، اویاندا، بویاندان، او بوجاقدا، او گوشهده، بو ائوده، ...
3. یئر مضمونلو سؤزلره "هر-هئچ" کلمهلرینى آرتیرماقلا دۆزهلنلر. میثاللار: هر یئرده، هر یاندان، هئچ طرفده، هر گوشهدن، هر بوجاقدان، هر کۆچهده، ....
4. یئر مضمونلو کلمهلرین باشینا "بیر" سایینى آرتیرماقلا دۆزهلنلر. میثاللار: بیر یاندا، بیر یاندان، بیر طرفده، بیر بوجاقدا، بیر ائودن، بیر طرفدن، ...