جۆملهنین اولینده گلن "بلى، یوخ، خئییر، یاخشى" سؤزلرى
دیلیمیزده "بلى، یوخ، خئییر، یاخشى" سؤزلرى جۆملهنین اولینده گلر و جۆملهنین اوبیرى عضولریله باغلى اولماز، بونا گؤره ده، آرا سؤز حئساب اولار. بو سؤزلردن "بلى" تصدیق، کنایه و یا تصدیق-آرزى مقامیندا ایشلهنر. میثاللار:
بلى، بلى! دئیه میرزا رسول اونون سؤزۆنۆ تصدیق ائدیب آرتیردى. (گ.صباحى)
بلی، بلی! یالقیزلیقدان. (گ.صباحى)
بو سؤزلردن "یوخ" یا دانیشانین اؤز سؤزۆنۆن و یا باشقاسینین دئدیگى فیکرى رد ائتمک اۆچۆن ایشلهنیر. میثاللار:
یوخ، تانریم! یاشاماق ایستهییرم. (گ.صباحی)
یوخ، بابا!... ائله بیر خبر یوخدور. (گ.صباحى)
یوخ، یوخ! منه گۆلزاردا پیمانه گرکمز. (م.شبسترلى)
بو سؤزلردن "خئییر" طرفین فیکرى و سؤزۆنه قارشى اعتیراض بیلدیرمک اۆچۆن ایشلهنیر. میثاللار:
خئییر، من گۆلمهلى دئییلم.... (ح.مهدى)
خئییر، خئییر،... ایشسیز دئین کیمى دئییل. (م.سلیمانوف)
بو سؤزلردن "یاخشى" سوال جۆملهلرینین اولینده گلر و مۆختلیف احساساتى نظره چاتدیرماق اۆچۆن دئییلر و بعضا تکرار اولار. میثاللار:
یاخشى! یاتارام، بد اخلاقلار. (گ.صباحى)
یاخشى، سن بو اوشاقلارى کۆچهلرده نه اۆچۆن گزدیریرسن؟ (ج.جبارلى)
یاخشى، یاخشى! اؤزۆنو تۆلکۆ اؤلۆمۆنه وورما. (گ.صباحى)
یاخشى، بونلارین قیمتى نئچهدیر؟ (ج.جبارلى)
سون
"شبیستر 1365/8/21 - دوقتور محمدتقی زهتابی"