فعللر (41)
فعلین داوام شکلى (فورمو)
کئچن درسده دئدیکلریمیز و گتیردیگیمیز میثاللاردان گؤردونوز کى، داوام شکلینده ده زامان شکیلچیسی یوخدور و یالنیز شخص سونلوقلارى واردیر.
داوام شکلینین ساده سینین عمومى فورمولو بئله اولار:
فعلین کؤکو + فورم شکیلچیسی + شخص سونلوقلارى.
یازماقدایام، یازماقداسینیز، اللشمکده ییک. ..
بۆتۆن بو فعللر ایندیکى زامانى بیلدیریر.
داوام شکلینین مۆرکبینین عمومى فورمولو بئله اولاجاقدیر:
فعلین کؤکو + فورم علامتى + کؤمکچى فعل + شخص سونلوقلارى.
"ایدى" کؤمکچى فعلى ایله یارانان داوام شکلى هم فعلى کئچمیش زامانا باغلاییر، هم ده حئکایت مضمونو یارادیر:
یازماقدا ایدیم، گلمکده ایدینیز، گؤتورمکده ایدى، گؤرمکده ایدیک. ..
"ایمیش" کؤمکچى فعلى ایله یارانان داوام شکلى هم فعلى کئچمیش زامانا باغلاییر، هم ده اوندا ریوایت معناسى یارادیر و عئینى زاماندا غیر شهودى اولور:
یازماقدا ایمیشم، بۆکمکده ایمیش سینیز، اوتورماقدا ایمیشیک. ..
فعلین داواملى شکلینده یوخاریدا گؤردویونوز ایکى کؤمکچى فعلدن باشقا، "ایسه" و یا اونون ایختیصارى "سا-سه" کؤمکچى فعلى ده، ایشلهنر.
بو کؤمکچى فعل یوخاریدا گؤردویونوز هر اۆچ داوام شکلى ایله ایشلهنر و هر اۆچۆن ده ایشین شرطله داوام ائتدیگینى بیلدیرر.
1. ساده داوام شکلینده: اوخوماقدایامسا، اوخوماقداسینیزسا، چالیشماقدا دئییل سینیزسه.
2. مۆرکب داواملى (حئکایت): اوخوماقدا ایدیمسه، ایشلهمکده دئییلدیم سه، چالیشماقدا دئییل ایدینیز سه. ..
3. مۆرکب داواملى (ریوایت-غیر شهودى): اوخوماقدا ایمیشم سه، چالیشماقدا دئییلمیش سینیزسه، ...
گؤروندویو کیمى بو سونونجو اۆچ شکلین بیرینجیسى ایندیکى زامانى، اوبیریلرى ایسه کئچمیش زامانى بیلدیریر.