فعللر (40)
فعلین داوام شکلى (فورمو)
دیلیمیزده داواملى کئچمیشدن باشقا، بیر ده فعلین ائله بیر شکلى واردیر کى، ایشین کئچمیشده باشلانیب، ایندى داوام ائتمهسینى بیلدیریر. بو شکلین خصوصى علامتى "ماقدا- مکده" دیر کى، واسیطهسیز فعلین کؤکونه قوشولار. بو شکلین ده ایکى فورماسى واردیر، اوندا دا زامان شکیلچیسی اولماز.
1. ساده داوام شکلى: بو شکلین علامتى "ماقدا-مکده"دیر. بیتیشن شخص عوضلیکلرى سسلیله باشلانسا، آرالاریندا "ى" سسسیزى ده یازیلار: اوخوماقدایام، گؤرمکدهیم، گلمکدهسن. ..
ساده داوام شکلینین اینکارى اولماز، آمما آزاراق ایشلهننده "دئییل" سؤزۆ "ماقدا-مکده" علامتیندن سونرا گلر:
2. مۆرکب داوام شکلى: بو شکلین علامتى "ایدى" دیر کى، "ماقدا-مکده" شکیلچیسیندن سونرا گلر، اؤزۆ ده هم کامیل، هم ده ایختیصارلا یازیلار و کئچمیش زامانى بیلدیرر: یاز + ماقدا + ایدى + م >>> یازماقدایدیم، گؤرمکده ایدینیز. ..
دئمک بو شکیل داوام فورماسینین حئکایهسی دیر. بونون هم قیسا، هم ده اوزون شکلینین غیر شهودیسى واردیر کى، ریوایت ساییلیر:
یازماقدا ایدی میش، یازماقدایدیمیش، گؤرمکده ایدی میش. گؤروندویو کیمى "میش" ریوایت علامتى یئرى گلدیکده شخص سونلوقلاریندان سونرا دا ایشلهنه بیلر.
بو شکلین ده اینکاریندا "دئییل" گلر: یازماقدا دئییل ایدیم، گؤرمکده دئییلدین...
"ایمیش-میش" واسیطهسیله دۆزهلن غیر شهودى هم کئچمیش زامانا دلالت ائدر، هم ده ریوایت معناسى وئرر: یازماقدا ایمیشم، اوخوماقدا ایمیش سینیز. ..
داوام شکلینین غیر شهودیسینین اینکارى دا "دئییل" واسیطهسیله دۆزهلر: یازماقدا دئییل میشسینیز، ایشلهمکده دئییل میشلر. ..
فعلین داواملى شکلینین صرفى:
* ساده فورما:
یازماقدایام، یازماقداسان، یازماقدادیر، یازماقداییق، یازماقداسیز، یازماقدادیرلار
* مۆرکب فورما:
ایشلهمکده ایدیم، ایشلهمکده ایدین، ایشلهمکده ایدى، ایشلهمکده ایدیک، ایشلهمکده ایدیز، ایشلهمکده ایدیلر
* غیر شهودى شکیل:
یاتماقدا ایمیشم، یاتماقدا ایمیشسن، یاتماقدا ایمیش، یاتماقدا ایمیشیک، یاتماقدا ایمیشسیز، یاتماقدا ایمیشلر